ده‌ڵێی ئاسمانی به‌هارم

هێمن ڕه‌ئووف

     

ده‌ڵێی ئاسمانی به‌هارم

خه‌میش هه‌وره‌ و سات نا ساتێ وه‌کو میوانێکی په‌ست

له‌به‌ر ده‌رگای دڵمدا ماندووێتی لێ ده‌چۆڕێ.

به‌ ناچاری وه‌ک خانه‌خوێیه‌کی بێچار

ده‌رگا ده‌خه‌مه‌ سه‌ر پشت و خه‌مێک دێت و خه‌مێک ده‌ڕوات.

ده‌ تاسێم و

پڕ ده‌بم له‌ نائومێدی له‌ حزوری ئه‌م میوانه‌ به‌دخووه‌دا

ده‌ڕه‌نجێم و

نه‌فه‌سم ئاونگی بێزاری ده‌گرێت

ئارامیم هه‌ره‌س ده‌هێنێت

هیواکانم یه‌که‌ یه‌که‌ ده‌تۆرێن و

ته‌مه‌نم به‌ره‌و ڕۆژئاوا ملی ئه‌م ڕێگایه‌ ده‌گرێت.

 

ده‌سا خوایه‌ ئه‌م به‌هاره‌ی له‌ چاره‌ی مندا خوڵقاوه،‌

بیبه‌ره‌وه‌ و هه‌ر بۆخۆت و من نامه‌وێ

هه‌وره‌کانت ماندووم ده‌که‌ن

ئه‌وان دێن و ده‌بارێن و ده‌گرین

منیش غه‌مگین

له‌ بری گوڵ و گیا ته‌نها،، خه‌مه‌ له‌ پێده‌شتی مندا وا ڕوواوه‌. ‌

 

سەمایەک لەگەڵ تۆ

هێمن ڕەئووف 

    

     

 

سەمایەکی بە کۆمەڵ دەکەین

 

تەنها من و یادگاریەکان

 

سەرم بە سنگی یادێکی تاڵەوەیە

 

دەستم لەدەستی پێکەنینێکی ساتەکانی خەیاڵییدا دە گوشرێ

 

فرمێسک

 

لە یادی دوا دیمەنی ماڵئاواییدا دەتکێ

 

تک تک لەگەڵ ڕیتمی ئەم سەمایەدا بەسەر شانی یادگاریدا دەڕژێ.

 

 

 

 

سەمایەک بە تەنها

 

لەگەڵ بەدبەختترین ساتەکانی تەنهاییم دا

 

بە بیر هاتنەوەی یەکەم چرکەسات دوای ئاودیو بوونت

 

ئەو کاتەی تەنهاتر لە خودا خۆمم دەبینی لەم شارە جەنجاڵەدا.

 

 

 

 

سەمایەک لەگەڵ تۆ

 

لە هەسارەی خەیاڵدا

 

بەیادی ئەو چرکە ساتەی بە دەنگی هەڵچڕینی قاپێ شەمپانیا

 

تەزوویەک لە ئاسودەی پڕی دەکردین لە قاقا

 

لەژێر بارینی بارانە وەڕەزەکانی وەرزی هاوین

 

لەسەر ئەو گەڵا هەڵوەریوانەی لە بەدبەختیاندا لە هەڕەتی لاویدا

 

وەریبوون و بووبوونە نامۆیەکی ئەبەدی.

 

 

 

 

ئێستا

 

نامۆتر لە هەموو کەس

 

تەنهاتر لە هەموو کەس

 

خەمبارتر لە هەموو کەس

 

تەنها منم

 

لێرە لە دووری تۆ

 

لەناو ئەم سەما بێئاوازانەدا بە خەیاڵیی خۆم ئەدۆزمەوە.

 

 

 

 

ئێستا

 

گەڵاکان هەموو پێکەوە دەوەرێن

 

بارانەکان هاوڕێی گیانی بەگیانی ئەم شارەن

 

من تاکە نەشازی سەر ئەم سکێچەم

 

تەنهاتر لە هەموو...

 

تەنهاترین تەنهام.

 

 

 

 

 

OCTOBER  2009

 

 

 

هه‌ساره‌ی خه‌یاڵ

هێمن ڕه‌ئووف       

ئێره‌

شارێکی تره ‌له‌ هه‌ساره‌یه‌کی تر

هه‌ساره‌یه‌کی تره‌ له ‌گه‌ردوونێکی تر

گه‌ردوونێکی تره‌ له‌ ده‌روونی مندا.

 

من لێره‌م

ئێره ‌وه‌ک ئه‌وێ نییه

لێره‌ یاسا و ڕێسا نییه‌

لێره‌ مانگه‌شه‌و ناتۆرێ

لێره‌ گوڵه‌کان ناوه‌رێن

لێره‌ مۆمه‌کان ناسوتێن

ئێره‌ خوداوه‌ندی نیه‌

لێرە دنیا ئاخیر نابێت

لێره‌ نه‌ به‌هه‌شتی لێیه‌ نه‌ جه‌هه‌نه‌م

 

من لێره‌م

ئێره‌ وه‌ک ئه‌وێ نییه

ئێره ‌هه‌ساره‌ی خه‌یاڵه‌

له ‌گه‌ردوونی خه‌یاڵدایه‌‌‌

لێره‌ ده‌توانم بفڕم

ده‌توانم پڕبم له‌به‌هار

ده‌توانم ببم به ‌ڕووبار

لێره‌ ده‌بمه‌وه‌ به‌چرۆ

ده‌ستم پڕده‌بێت ‌له‌ خونچه‌

چاوم پڕه‌ له‌ڕه‌نگه‌کان

دڵم پڕه‌ له‌ عه‌شقی تۆ

 

له‌م کۆڵان بۆ ئه‌و کۆڵان

له‌م دره‌خت بۆ ئه‌و دره‌خت

هه‌ر بازبازێنمه‌ و هه‌ر فڕینمه‌ له‌م مه‌ودا زیوینه‌دا

نیازم نیه‌ جێیبهێڵم

نایه‌مه‌وه ‌بۆلای ئێوه

ئێستا ئێره‌م پێخۆشتره له‌لای ئێوه‌‌‌

من هه‌ر لێره‌م له‌م سه‌رزه‌وی خه‌یاڵه‌دا

وێڵی مورووی ئه‌فسانه‌ییم

تا باخه‌ڵم پڕنه‌که‌م ناگه‌ڕێمه‌وه

تا چاوم تێر نه‌که‌م نایه‌مه‌وه‌

تا دڵم خاڵی نه‌که‌مه‌وه ‌نایه‌مه‌وه‌‌

 

ئێره ‌به‌هه‌شتی خه‌یاڵه‌

ئێره‌ ئازاری لێ نییه‌

لێره‌ هاواری لێ نییه‌

لێره ‌هه‌موو شتێ بێده‌نگ

هه‌موو جوڵه‌یه‌کی نه‌شاز ڕاوه‌ستاوه‌

هه‌موو مرۆڤێک بێ جه‌سته‌

ئێره‌ ماڵی شیعری خۆمه‌

خۆم درووستی ده‌که‌م ئێره‌

ئێره‌ له‌دوا ساته‌کانی ژیانمدا

ده‌بێته ‌دوا نیشتیمانم.

 

ئه‌م هه‌ساره‌ خه‌یاڵییه‌ که‌شێکی ڕوون و هێوره‌‌

له ‌پریاسکه‌ی ڕه‌شه‌بایه‌کی بێ ئه‌نوا به‌جێماوه‌

‌

ئاوازی دوای لێزمه‌بارانی  خه‌مێکه‌

هێشتا شێی سروودی ئاوی تێدا ماوه‌.

 

لێره ‌دڵ ته‌ڕ ده‌بێته‌وه‌

چاو ڕوون و گه‌ش ده‌بێته‌وه‌

لێره ‌پێکه‌نین هه‌رزانه

خونچه‌ به‌ئاره‌زووی دڵم ده‌کرێته‌وه.

 

ئێره‌ کارخانه‌ی شیعرمه‌

دیوه‌خانی به‌یته‌کان و ئاسمانی هه‌سته‌کان و

سه‌رزه‌مینی نه‌خشاندنی ئه‌وینمه‌

 

خه‌یاڵ جێژوانێکی قه‌شه‌نگ

مه‌ودایه‌کی ڕه‌نگاوڕه‌نگه‌

له   ‌د  و  و  ر  ی     ئه  ‌و    ..     پڕه     ‌له‌     ئه‌و    ..     پڕه     ‌له‌     ئه‌و.

‌july, 2009