له‌ دوای مه‌رگه‌ساتی عه‌شق و

 

به‌ردبارانکردنی ئه‌ڤین

 

له‌ دوای تێکدانی هێلانه‌ و

 

شکستی باڵی باڵنده‌ی عه‌شق و ئه‌وین !

   

له‌ وای کۆستکه‌وتنی هه‌سته‌ ساواکانم

 

دوای چه‌مینه‌وه‌ی پێنوسم

 

له‌دوای گریانی به‌ کوڵی په‌نجه‌کانم

 

دوای سه‌رنانه‌وه‌ی ئومێده‌ مه‌سته‌کانم !!!

   

دوای بێزار بوون

 

له‌ هه‌یبه‌ت و له‌ پیاوه‌تیم

 

دوای نه‌فره‌تم له‌ هێز و له‌ ئازایه‌تیم !!!!

   

چه‌ند شه‌وێ بۆ پاڕانه‌وه‌

 

بێوچان و بێ پشوویه‌ك

 

بۆ لوتکه‌ی شیعرێێکی بێزار  

 

بۆ تووله‌ ڕێی

 

ناوجه‌نگه‌ڵانی ووشه‌ی تاڵ

 

ڕێگام ده‌بڕی .

   

هه‌نگاو هه‌نگاو ....

 

بێ پشویه‌ک ،

 

ماندوو ماندوو  ....

 

بێ پشویه‌ک ،

 

هه‌ناسه‌م توند ....

 

بێ پشویه‌ک .

 

چاوم سور و جه‌سته‌م شه‌ته‌ک  ..... ..

 

دڵم ماندوو  ،

 

به‌بێ پشوو

 

هه‌ڵپه‌م ده‌کرد خه‌وم ده‌کوشت !!!

   

تا بتوانم حیکایه‌تێ

 

له‌ قیامه‌ت بهێنمه‌وه‌ .

   

ئه‌وه‌ی بینیم !!!!!!!!!!!!

 

هۆسه‌یه‌ک بوو ،

 

تابلۆیه‌ک له‌ قیامه‌ت نمایشی ساتی ئه‌م ناهه‌قییه‌ی ده‌کرد !

   

ئه‌وه‌ی بینیم !!!!!!!!!!!!!!

 

کڵێشه‌یه‌ک بۆ شێت بوونی ئه‌م گه‌ردوونه

 

سه‌مایه‌کی تێکشکاو و

 

یارییه‌کی ترسناکی

 

پێشکه‌ش ئه‌کرد !!

 

‌

 

له‌و تێکڕژان و که‌س به‌که‌سه‌ی ده‌شتی قیامه‌تدا ... 

   

هه‌ر گڕبوو

 

له‌ دۆزه‌خ هه‌ڵده‌هاتو

 

بۆ زه‌ریاکان هوروژمی بۆ خامۆش بوون ده‌برد ! ! !

    

هه‌ر ئه‌ستێره‌ بوو ،

 

ئاواره‌ی گه‌ردوونێکی تر ده‌بوو !!!!!!

   

هه‌ور ه‌کان

 

په‌ڵه‌ په‌ڵه‌ له‌به‌رده‌م هه‌ر ئه‌ستێره‌یه‌کدا

 

ده‌بوونه‌ چقڵی چاو و دڕکی به‌ر پێ ،

 

ده‌یان پرسی !

 

له‌ کوێی تر گه‌ردوونێ هه‌یه‌؟

 

ئه‌ی له‌وێ ئاسمانی لێیه‌ ؟؟

 

ئه‌ی زه‌وی و خۆر ؟؟؟

 

ئه‌ی ڕووبار و ئه‌ی دره‌خت و ئه‌ی بیابان و شاخو ده‌شت ؟؟؟؟

 

له‌ کوێی تر گه‌ردوونێ هه‌یه‌ ؟

 

ده‌ بمانبه‌ن !

 

نامانه‌وێ لێره‌ ببینه‌ بارانی

 

یان ئاره‌قی ناوچه‌وانی

 

زه‌وییه‌کی بێ ئابڕوو !!!!!!!!!!!! .

      

مانگ 

 

له‌ که‌ناری بیابانێکدا

 

هێدی هێدی له‌ شه‌رمانا ده‌توایه‌وه‌‌و ده‌بووه‌‌ خۆڵ و ئاگری داخ .

   

خۆر

 

له‌و خه‌ڵکه‌ی ئه‌وێ وورده‌ وورده‌ نزیک نزیک ده‌بووه‌وه‌ و

 

قرچه‌ قرچی پێستی ئه‌وان بۆچه‌کێکی قێزه‌‌ونی جێده‌هێڵا !!

   

جه‌هه‌ننه‌م

 

په‌یتا په‌یتا ده‌روازه‌کانی خه‌فه‌ ده‌بوون و سه‌ری خۆی ده‌نایه‌وه‌‌

 

له‌تاو ئه‌و سارد بوونه‌وه‌یه‌ی هه‌ناو و

 

ئه‌و به‌قه‌قنه‌س بوونه‌ی گڕ دا !

   

به‌هه‌شتی ڕازاوه‌

 

که‌وتبووه‌‌ به‌ر ڕه‌حمه‌تی بوومه‌له‌رزه‌یه‌کی به‌هێز

 

نه‌پێغه‌مبه‌ران و نه‌ ئه‌ولیا و

 

نه‌ پیاو چاکان و نه‌ شه‌هیدان

 

که‌س بێبه‌ش نه‌ده‌بوو له‌و زیانه‌ پڕ له‌ له‌رزه‌یه‌ و

 

هه‌موو ئه‌م هه‌واڵه‌ دڵته‌زێنه‌یان ده‌خوێنده‌وه‌ .

   

ئه‌مه‌بوو ساتی نمایشکردنی سته‌م ،

 

له‌ ڕۆژی يوم ألحساب دا  .

   

سته‌می به‌ردباران کردنی

 

عه‌شقی دوعا و ،

 

ڕووت کردنه‌وه‌ی جه‌سته‌ی دوعا و ،

 

له‌ خوێنی خۆیا گه‌وزانی پرچی دوعا  .

   

ئه‌ی خودایه‌

 

بۆچی له‌ پێش گه‌یشتنیا

 

بۆ ناو چنگی گه‌له‌ گورگ و مرۆڤه‌ که‌ڵبه‌ تیژه‌کان

 

وه‌کو مه‌سیح هه‌ڵتنه‌کێشا بۆ ئاسمان ؟؟؟؟؟

   

خۆ هه‌ر نه‌بێ

 

شه‌پۆلی ئه‌و بلۆکانه‌ی نه‌ده‌بینی

 

کاتێ که‌لله‌ی دووکه‌رت کردو خوێنی ڕژان !!!!!!!!!!!!!!

   

ئه‌ی خودایه‌

 

مه‌سیح و دوعا کێهانیان بێکه‌س تر بوون

 

له‌ ساته‌کانی سته‌مدا ؟؟؟

   

دوعا و مه‌سیح کامیان ده‌سه‌وسانتر بوون

 

له‌و کاتی به‌ردبارینه‌دا ؟؟؟؟؟

   

په‌روه‌ردگار

   

بۆ ده‌بێ ژن نێچیرێکی ده‌سته‌مۆ بێ و پیاویش ڕاوچییه‌کی جه‌للاد ؟؟؟؟؟؟؟؟؟؟

 

بۆ ده‌بێ پیاو دار بڕێکی ناحاڵی بێت له‌ باخێکی گوڵه‌ ژندا ؟؟؟؟؟؟؟؟؟؟؟؟؟؟؟