شه‌وی عه‌شق (ڤالانتاین)

  

هێمن ڕه‌ئووف

  

عه‌شقم بۆ  تۆ 

 

وه‌کو هه‌ورێکی بێزاری به‌هارانه‌

 

ئه‌و ده‌یه‌وێ

 

به‌سه‌ر په‌ڕه‌ی گوڵه‌کاندا

 

بۆ هه‌ڵاڵه‌ی گوڵێکی جوان

 

ببێ به‌ که‌ژکه‌ژه‌و تارا

 

که‌چی پێش گه‌شتن به‌ زه‌مین

 

ده‌بێ به‌ ئاو و به‌ باران

     

منیش له‌م وه‌رزی عه‌شقه‌دا

 

له‌م شه‌وی ڤالانتینه‌دا

 

له‌م ساتی سه‌مای ئه‌وین و

 

چرکه‌ پڕ پێکه‌نینه‌دا

 

ده‌مه‌وێ ببم به‌ که‌پرێ

 

له‌ سایه‌ما وچانی ئاسوده‌یی به‌ی

     

به‌ڵام چیبکه‌م

      

نه‌ ده‌ستم ده‌بزوێ

 

ده‌ستی ناسکی تۆ توند بگرم و

 

نه‌ چاو ده‌تروکێ

 

نیگا له‌ وێنه‌که‌ی تۆ بگرم و

 

نه‌ پێم هه‌یه‌ بێم بۆ لات و

 

نه‌ باڵم هه‌یه‌ بفڕم

     

تا هیچ نه‌بێ

 

به‌ گوڵێکی سوری ساوا

 

ئه‌م ئێواره‌

 

بزه‌یه‌کت پێببه‌خشم

     

یان هه‌ر نه‌بێ

 

به‌ ماچێکی ته‌ڕ و پاراو

 

له‌ زه‌خره‌فه‌ی ئه‌م عه‌شقه‌ماندا

 

بنه‌خشم

     

ئه‌م شه‌و شه‌وی ڤالانتینه‌ و

 

نه‌ تۆ لێره‌ و نه‌ من له‌وێ

     

بۆیه‌ ئاوا

     

من زه‌ویه‌کی شه‌ق بردووم

 

وه‌رزم سه‌ره‌تای پایزه‌ و

 

بارانی خوڕه‌مم ده‌وێ

        

تۆش تروسکه‌ی چرایه‌کی

 

بێکه‌س و به‌ته‌نهایه‌کی

 

به‌ چاوه‌ڕوانی له‌وێوه‌

 

په‌پوله‌ی ئه‌م دڵه‌ ته‌نگه‌ی منت ده‌وێ

شه‌وی عه‌شق (ڤالانتاین)

  

هێمن ڕه‌ئووف